Målgruppe:
I prosjektet ”Skattkista; kjelde til leseglede og leselyst. Biblioteksamarbeid for små lesesterke setesdølar” skal Bykle Folkebibliotek ha førskulebarna som målgruppe. 
Mål for prosjektet; 
* Førskulebarnet skal få positive opplevingar gjennom litteraturen og få både leseglede og leselyst. 
 

Val av målgruppe:
Prosjektet ” Skattkista” er eit felles prosjekt for biblioteka i dei fem kommunane i Setesdalen. 
I forkant av prosjektstart er det allereie satt i gang lesestimuleringstiltak på begge skulane i Bykle kommune, der måla er å auke barnets leseferdigheit og lesehastigheit. Skulebarnets haldning til litteratur, lesing og skriving, hans leseglede og leselyst, er viktige for at tiltaka skal virke og skulens mål bli nådd.
Barn fram til skulepliktig alder har i eit par år vore målgruppe for aktivitetar på både Bykle folkebibliotek og Hovden filial. Vi meiner at litteratur gitt til barnet gjennom høgtlesing, dramatisering, leiking osb. styrker både hans muntlege språk, hans ordforråd og forståing, og hans konsentrasjonsevne. Men for at grunnlaget for seinare opplæring i skriftspråk og lesing skal vere godt, er det viktig at barnet i tidleg alder får positive opplevingar av litteraturen. 
På bakgrunn av dette har vi valt å sette førskulebarna som målgruppe for prosjektet. 
 

Samarbeidspartnarar i kommunen:
Bykle har to barnehagar; Bykle Barnehage og Fjellgardane Barnehage. Prosjektansvarleg samarbeider med styrar på begge barnehagar om aktivitetar og tiltak.
For å kome i kontakt med foreldre og gje dei informasjon, skal prosjektansvarleg samarbeide med helsesyster i kommunen.
 

Tiltak:
Gjennom prosjektet skal barna bli språkleg stimulert gjennom positive aktivitetar på biblioteket, i samarbeid med barnehagane og helsesyster i kommunen. Vi vil og informere foreldra om kor viktig språkstimulering er for barnets vidare språkutvikling, både muntleg og skriftleg, men at barnet må oppleve dette som positivt, for å få både leseglede og leselyst.

• Informasjon til foreldra på foreldremøte i barnehagane, brosjyre til foreldra om språk- og lesestimulering
• Informasjon til foreldra gjennom helsesyster, lesestimuleringspakke/kuffert til helsesyster
• Barnehagane skal besøke biblioteka der det er høgtlesing av biblioteketpersonalet. Biblioteket bruker skattekista som innfallsport til opplevingane – hentar boka derifrå. Fire besøk i haustsemesteret, fire besøk i vårsemesteret
• Utstillingar av teikningar barna lager til eit eventyr, i etterkant av ein periode med bibliotekbesøk
• Stille til rådighet litteratur om og av forfattarar, tema og liknande dei arbeider med i barnehagane
• Aktivitetskveld på biblioteket, ein gong per månad, totalt åtte gonger per år. Eksemplar på aktivitetar: - Biblioteket bruker skattekista som innfallsport til opplevingane.
• Høgtlesing av eventyr, historie, biletbok osb.
• Regler, rim og dikt – høgtlesing, lære det utenat eller lage sjølv/gruppevis
• Eventyrstund, der barna sjølv skal vere med å spille eventyr
• Bamsekveld
• Juleforberedingar, lage julepynt, høyre julesongar, snakke om jula
• Lage påskegodt, påskepynt. Barna lager eit påskedikt i saman
• ”fest” på biblioteket med saft og bollar der barna skal fortelje om eit gitt emne
• Bokgåve til 5-åringane
• Barnebok/biletbok-depot hos helsesyster og på legekontora
• ”Skattkiste-fest” 23.april (bokdagen), felles arrangement for Hovden filial og Bykle Folkebibliotek. Barna skal kle seg ut som eventyrfigurar, fotografiar skal tas og stillast ut i biblioteket.

Omfang:
Tiltaka skal i utgangspunktet løpe heile prosjektperioden;
Informasjon til foreldra vert gitt ein gong per år.
Aktivitetskveldar og bibliotekbesøk skal foregå fire gonger kvart halvår.
Utstillingar av teikningar to gonger i året, fotografi ein gong per år.
Bokgåve kvart år.
Utskifting av bokdepot kvart halve år.
”Skattkiste-fest” 23.april kvart år.

Endring av tiltak og omfang kan kome etter evaluering. Prosjektansvarleg skal før evalueringsmøte med biblioteksjefgruppa, evaluere tiltaka lokalt saman med barnehagestyrarar og helsesyster.